Azərbaycan iqtisadiyyatı yarım ildə
2019-cu ilin birinci yarısında Azərbaycanın ümumi daxili məhsulu (ÜDM) əvvəlki ilin yanvar-iyun ayları ilə müqayisədə 2,4 faiz artaraq 37 milyard 825,2 milyon manata çatıb. Novator.az-ın məlumatına görə, Dövlət Statistika Komitəsi əhalinin hər nəfərinə düşən ÜDM-i 3828,1 manat göstərir.
Hesabata əsasən, ÜDM istehsalının 44,6 faizi sənayenin, 9,9 faizi ticarət; nəqliyyat vasitələrinin təmiri, 6,2 faizi nəqliyyat və anbar təsərrüfatı sahələrinin, 5,9 faizi tikintinin, 5,6 faizi kənd təsərrüfatı, meşə təsərrüfatı və balıqçılıq, 2,6 faizi turistlərin yerləşdirilməsi və ictimai iaşə, 1,7 faizi informasiya və rabitə sahələrinin, 14,5 faizi digər sahələrin payına düşüb, məhsula və idxala xalis vergilər ÜDM-in 9 faizini təşkil edib.
Altı ayda informasiya və rabitə sahələrində əlavə dəyər 15,8 faiz, kənd təsərrüfatı, meşə təsərrüfatı və balıqçılıq sahələrində 13,1 faiz, turistlərin yerləşdirilməsi və ictimai iaşə sahələrində 3,3 faiz, sənayedə 2,9 faiz, ticarət; nəqliyyat vasitələrinin təmiri sahələrində 2,8 faiz, nəqliyyat və anbar təsərrüfatı sahələrində 2,5 faiz, digər xidmət sahələrində 1,8 faiz artıb, tikintidə isə 11,2 faiz azalıb.
İqtisadiyyatın neft-qaz sektorunun 1,3 faiz, neft və qazsız bölümünün 3,2 faiz yüksəldiyi bildirilir.
