Azər Qasımlı ilə bağlı qadağa ləğv edilib
İyulun 12-si Nəsimi Rayon Məhkəməsi Respublikaçı Alternativ Partiyası Məclisinin başqanı Azər Qasımlının ölkədən çıxışına qoyulmuş qadağanı ləğv edib.
Qadağanı Baş Prokurorluğun Ağır Cinayətlərə Dair İşlər üzrə İstintaq İdarəsi 3 il qabaq qoymuşdu. Prokurorluq qadağanı istintaqı aparılan cinayət işlərinin birində Azər Qasımlının adının şahid kimi keçməsi ilə əsaslandırırdı.
Azər Qasımlı Baş Prokurorluğun qoyduğu qadağanın ləğvi üçün əvvəllər də yerli məhkəmələrə müraciət etmiş, müraciəti təmin olunmadığına görə Avropa İnsan Hüquqları Məhkəməsinə şikayət vermişdi. 2018-ci ilin dekabrında Avropa Məhkəməsi Azər Qasımlının sərbəst hərəkət etmək hüququnun pozulduğunu tanımış və Azərbaycan hökumətini cərimələmişdi.
