Dustaq Aydın Qurbanovun ölümü: rəsmi izahat yayıldı
İyulun 11-də Baş Prokurorluq və Ədliyyə Nazirliyinin Penitensiar Xidməti birgə məlumat yayıb. Qeyd olunur ki, ayrı-ayrı dövrlərdə üç dəfə məhkum olunmuş 1967-ci il təvəllüdlü Qurbanov Aydın Fərhad oğlu 2018-ci ildə Gəncədə baş vermiş terror aktı, hakimiyyətin zorla ələ keçirilməsinə yönələn hərəkətlər və sair dövləti cinayətlərinə görə tutulub: “O, 30 iyul 2018-ci ildə Cinayət Məcəlləsinin 228.3-cü (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə mütəşəkkil dəstə tərəfindən törədildikdə) maddəsi ilə həbs edilib.
İstintaq zamanı Aydın Qurbanovun yaşadığı evdə axtarış aparılıb. Evin çardağından Aydın Qurbanovun ayrı-ayrı cinayətlərdə istifadə etdiyi 1 ədəd “Kalaşnikov” konstruksiyalı avtomat silahı, 1 ədəd “Makarov” markalı, 1 ədəd “Marqolin” markalı tapançalar, 508 ədəd avtomat və tapança patronları, 9 ədəd sandıqça və sair döyüş sursatı aşkar edilib.
Aydın Qurbanov xəstəliyi ilə əlaqədar 15 mart 2019-cu ildə Penitensiar Xidmətin Müalicə Müəssisəsinə köçürülüb və iyulun 9-da vəfat edib.
Həyat yoldaşı və müdafiəçisinin müraciətləri ilə əlaqədar onun barəsində 31 may 2019-cu ildə məhkəmə-tibb ekspertizası təyin olunub və saxlandığı şəraitdə həkimlərin nəzarəti altında müalicəsinin davam etdirilməsinin mümkünlüyü barədə rəy verilib.
Aydın Qurbanovun işgəncə verilməsi nəticəsində vəfat etməsi barədə yayılmış məlumatlar həqiqəti əks etdirmir. İstintaq təcridxanasında və müalicə müəssisəsində olduğu dövrdə ona işgəncələr verilməsi ilə əlaqədar hər hansı müraciət daxil olmayıb, eləcə də müalicə aldığı dövrlərdə müayinə zamanı və vəfat etdikdən sonra meyitə baxış keçirilərkən bədəni üzərində hər hansı xəsarət və ya xəsarət izləri aşkar edilməyib”.
