Ukraynada sorğu: parlamentə 4 partiya keçir
Kiyev Beynəlxalq Sosiologiya İnstitutu parlament seçkisi ilə bağlı yeni sorğunun nəticələrini açıqlayıb. Novator.az-ın məlumatına görə, iyunun 25-dən iyulun 7-dək 129 yaşayış məntəqəsində keçirilmiş sorğuya 2004 respondent cəlb olunub.
İyulun 21-i ölkədə parlament seçkisi keçiriləcək. Ukrayna Konstitusiyasına görə, hökuməti 450 yerlik parlamentdə azı 226 mandatı olan siyasi qüvvə qurur. Parlamentin 225 deputatı majoritar (dairələr üzrə), 225 deputatı proporsional (partiya siyahıları üzrə) sistemlə seçilir.
Seçkidə proporsional sistem üzrə 22 partiya yarışır: Müxalif Blok; Güc və Şərəf; Batkivşina; Vətənpərvər; İnsanların Gücü; Müxalif Platforma; Yaşıllar; Məşəl; Samopomoş; Avropa Həmrəyliyi; Ukrayna Strategiyası; Vətəndaş Mövqeyi; Sosial Ədalət; Xalq Xidmətçisi; Hüququn Gücü; Radikal; Şarinin Partiyası; Səs; Müstəqillik; Aqrar; Azadlıq; Yeni Qüvvələr Hərəkatı.
Ümumilikdə 5500-dən çox namizəd var.
Kiyev Beynəlxalq Sosiologiya İnstitutunun yeni sorğusuna əsasən, parlamentə düşmək üçün tələb olunan 5 faizlik baryeri 4 partiya keçir. Mövqeyini qətiləşdirən respondentlərin 48,5%-i prezident Vladimir Zelenskini dəstəkləyən Xalq Xidmətçisi Partiyasına səs vermək niyyətində olduğunu bəyan edib.
Deputat Yuri Boykonun Müxalif Platforma Partiyasına respondentlərin 14,1%-i üstünlük verir.
Sabiq prezident Pyotr Poroşenkonun Avropa Həmrəyliyi Partiyası sorğuda 9,2%, deputat Yuliya Timoşenkonun Batkivşina Partiyası 6,2% nəticə göstərib.
Musiqiçi Svyatoslav Vakarçukun Səs Partiyası hələlik 4,4%, general-polkovnik İqor Smeşkonun Güc və Şərəf Partiyası 4,1% səsə ümid edir.
