Serbiya ilə əməkdaşlıq komissiyası yeniləndi
Prezident İlham Əliyev Azərbaycanla Serbiya arasında ticarət və iqtisadi əməkdaşlıq üzrə hökumətlərarası komissiyanın tərkibini yeniləyib. Novator.az bildirir ki, iyulun 8-də imzalanan sərəncama əsasən, komissiyanın həmsədri postu əmək və əhalinin sosial müdafiəsi nazirinə həvalə olunub. Hazırda əmək və əhalinin sosial müdafiəsi naziri postunu Sahil Babayev tutur.
Azərbaycan tərəfdən komissiyanın üzvləri bu vəzifələri tutan şəxslər sayılır: xarici işlər nazirinin müavini, iqtisadiyyat nazirinin müavini, energetika nazirinin müavini, nəqliyyat, rabitə və yüksək texnologiyalar nazirinin müavini, mədəniyyət nazirinin müavini, kənd təsərrüfatı nazirinin müavini, təhsil nazirinin müavini, səhiyyə nazirinin müavini, gənclər və idman nazirinin müavini, Dövlət Gömrük Komitəsi sədrinin birinci müavini, Dövlət Turizm Agentliyinin sədri, Qida Təhlükəsizliyi Agentliyi sədrinin müavini, Azərbaycanın Serbiyada səfiri.
2011-ci il iyunun 7-də yaradılmış komissiyaya indiyədək iqtisadiyyat naziri Şahin Mustafayev həmsədrlik edib.
