Məhbus cəbhəçinin şikayəti üzrə ilkin baxış olub
AXCP Ali Məclisi Rəyasət Heyətinin həbsdə olan üzvü, Qarabağ qazisi Asif Yusifli Suraxanı Rayon Məhkəməsinin bu il mayın 29-da çıxardığı qərardan apellyasiya şikayəti verib.
Asif Yusifli 2014-cü il noyabrın 25-dən həbsdədir. 2015-ci ilin iyulunda məhkəmə onu dələduzluqda və sənədlərin saxtalaşdırılmasında təqsirli bilərək 7 il 6 ay müddətinə azadlıqdan məhrum edib. Sonradan Ali Məhkəmə cəzanı 5 ilə endirib.
2019-cu ilin yazında Asif Yusifli cəzasının xeyli hissəsini çəkdiyinə görə vaxtından əvvəl şərti azadlığa buraxılması üçün Suraxanı Rayon Məhkəməsinə müraciət edib. Lakin məhkəmə müraciəti təmin etməyib.
“Amerikanın səsi” xəbər verir ki, Asif Yusiflinin Suraxanı məhkəməsinin qərarından verdiyi şikayətə iyulun 9-u Bakı Apellyasiya Məhkəməsində ilkin baxış olub. Məhkəmə baxışı iyulun 22-nə təyin edilib.
