Yunanıstanda yeni baş nazir
Yunanıstanda parlament seçkisini udan Yeni Demokratiya Partiyasının lideri Kiriakos Mitsotakis iyulun 8-də baş nazir postuna əyləşib. Ölkə prezidentinin hüzurunda and içən siyasətçiyə hökumət qurmaq həvalə olunub.
İyulun 7-də keçirilmiş növbədənkənar parlament seçkisində Yeni Demokratiya Partiyası 300 yerlik qanunverici orqanda 158 mandata sahib çıxıb.
2015-ci ildən hökumətə başçılıq edən Aleksis Siprasın SİRİZA Partiyası 86 yerlə kifayətlənib.
KİNAL Hərəkatı 22, Kommunist Partiyası 15, Yunan Qərarı Hərəkatı 10, MERA25 Hərəkatı 9 mandat götürüb.
Novator.az bildirir ki, Kiriakos Mitsotakis 1968-ci ildə paytaxt Afinada doğulub. 1990-1993-cü illərdə baş nazir postunu tutmuş mərhum Konstantinos Mitsotakisin oğludur.
ABŞ-da Harvard Universitetinin sosial elmlər fakültəsini bitirən Kiriakos Mitsotakis həmin ölkənin Stenford Universitetində beynəlxalq münasibətlər üzrə, Harvard Biznes Məktəbində idarəçilik üzrə magistr təhsili də alıb.
2004-cü ildən parlamentin deputatıdır. 2013-2015-ci illərdə inzibati islahatlar və elektron idarəçilik naziri postunu tutub.
Kiriakos Mitsotakis Yeni Demokratiya Partiyasına 2016-cı ildən liderlik edir.
