Avropalı məruzəçi müxalifətlə müzakirələr aparıb
Avropa Şurası Parlament Assambleyasının Monitorinq Komitəsinin Azərbaycan üzrə məruzəçisi Stefan Şennak iyulun 6-sı Bakıda müxalifət liderləri ilə görüşüb. Xəbəri Müsavat Partiyası yayıb.
Stefan Şennakla görüşə Müsavat başqanı Arif Hacılı, Demokratik Qüvvələrinin Milli Şurasının sədri Cəmil Həsənli, AXCP sədri Əli Kərimli, Respublikaçı Alternativ Partiyası Məclisinin başqanı Azər Qasımlı, və Liberal Partiyasının sədri Əvəz Temirxanın qatıldığı xəbər verilir.
Görüşdə partiyaların vəziyyəti, siyasi məhbuslar problemi və digər məsələlər müzakirə olunub.
Stefan Şennak Azərbaycana iyulun 4-də başlayan səfəri zamanı dövlət rəsmiləri, Milli Məclisin deputatları, QHT təmsilçiləri, media rəhbərləri ilə də bir araya gəlib.
İyulun 6-da o, “Turan” informasiya agentliyinin ofisinə baş çəkib, jurnalistlərin necə işləməsi ilə maraqlanıb, Avropa Şurası və Azərbaycan əlaqələri kontekstində media, vətəndaş cəmiyyəti və digər sahələrdə fikir mübadiləsi aparıb.
