İlkin raundların 7 itkisi var
UEFA-nın klub turnirlərində ilkin təsnifat raundları arxada qalıb. Novator.az-ın məlumatına görə, Avropa Liqasının ilkin mərhələsində 7 komanda mübarizəni dayandırıb. Cəbəllütariq və San Marino hərəyə 2, Kosovo, Farer adaları və Andorra hərəyə 1 klub itirib.
Çempionlar Liqasının ilkin mərhələsindən ələnən Cəbəllütariq, Andorra və San Marino təmsilçiləri isə Avropa Liqasına transfer olunublar.
2019-2020-ci illər mövsümündə Çempionlar Liqasına 79, Avropa Liqasına 158 komanda vəsiqə alıb.
İspaniya, İngiltərə, İtaliya və Almaniyadan Çempionlar Liqasına 4, Avropa Liqasına 3 komanda buraxılıb.
Fransa və Rusiya həm Çempionlar Liqasına, həm Avropa Liqasına 3 komanda göndərib.
Portuqaliya, Ukrayna, Belçika, Türkiyə, Avstriya, İsveçrə, Çexiya, Hollandiya, Yunanıstan Çempionlar Liqasına 2, Avropa Liqasına 3 komanda verib.
Xorvatiya, Danimarka, İsrail, Kipr, Rumıniya, Polşa, İsveç, Azərbaycan, Bolqarıstan, Serbiya, Şotlandiya, Belarus, Qazaxıstan, Norveç, Sloveniya, Slovakiya, Moldova, Albaniya, İslandiya, Macarıstan, Makedoniya, Finlandiya, İrlandiya, Bosniya, Latviya, Estoniya, Litva, Monteneqro, Gürcüstan, Ermənistan, Malta, Lüksemburq, Şimali İrlandiya, Uels, Farer adalarından Çempionlar Liqasına 1, Avropa Liqasına 3 komanda gəlib.
Cəbəllütariq, Andorra, San Marinodan Çempionlar Liqasına 1, Avropa Liqasına 2 komanda qatılıb.
Kosovonun 1 komandası Çempionlar Liqasına, 1 komandası Avropa Liqasına dəvət alıb.
Lixtenşteyn 1 komanda ilə yalnız Avropa Liqasında təmsil olunur.
Çempionlar Liqasının birinci mərhələsində (9-17 iyul) Azərbaycan təmsilçisi “Qarabağ”a Albaniyanın “Partizani” klubu rəqib olub.
Avropa Liqasının birinci mərhələsində (11-18 iyul) “Neftçi” Moldovanın “Speranta” klubu, “Səbail” Rumıniyanın “Universitatya” komandası ilə görüşəcək.
“Qəbələ” turnirə ikinci mərhələdən (25 iyul-1 avqust) qoşulur. Bu raundda o, Gürcüstan paytaxtının “Dinamo” klubu ilə üz-üzə gələ bilər. Ancaq “Dinamo” bundan ötrü birinci mərhələdə “Enqordani” (Andorra) klubunu udmalıdır.
