Büdcə sənədlərində nə yeniliklər gözlənir?
Parlamentə 2019-cu ilin dövlət büdcəsinə dəyişikliklər layihəsi təqdim olunub. Novator.az-ın məlumatına görə, layihədə müdafiə xərclərinin 3 milyard 37,6 milyon manatdan 3 milyard 187,6 milyon manata artırılması nəzərdə tutulur.
Sosial müdafiə və sosial təminat xərcləri 2 milyard 620,4 milyon manatdan 2 milyard 470,4 milyon manata enir.
2019-cu ilin icmal büdcəsinin xərclərinin yuxarı həddinin məbləği 27 milyard 155,8 milyon manatdan 27 milyard 370,8 milyon manata yüksəlir.
Büdcə zərfinə daxil olan digər sənədlər də yenilənir. Dövlət Sosial Müdafiə Fondunun 2019-cu il üzrə gəlirləri və xərcləri 3 milyard 928,1 milyon manat nəzərdə tutulub. Layihəyə əsasən, gəlirlər və xərclər 4 milyard 128,1 milyon manata qaldırılır.
İşsizlikdən sığorta fondunun 2019-cu il büdcəsinin gəlirləri və xərcləri 83 milyon 451,4 min manat həddində rəsmiləşib. Yeniliyə görə, gəlirlər və xərclər 98 milyon 451,4 min manat olacaq.
