Naxçıvanda orta maaş nə qədərdir?
Naxçıvan Muxtar Respublikasının Dövlət Statistika Komitəsi bölgənin sosial-iqtisadi göstəricilərini açıqlayıb. Novator.az bildirir ki, hesabata görə, 2019-cu ilin yanvar-may aylarında muxtar respublikada 985,2 milyon manatlıq ümumi daxili məhsul istehsal olunub, bu da 2018-ci ilin ilk beş ayı ilə müqayisədə 1,2 faiz çoxdur. Hər bir nəfərə düşən ümumi daxili məhsulun həcmi 1,9 faiz artaraq 2157,3 manata çatıb.
Sənayedə 441,7 milyon manat dəyərində məhsul istehsal edilib, 1,3 faizlik artım qeydə alınıb.
5 ayda əsas kapitala 399 milyon 82 min manat vəsait yönəldilib, bu da bir il öncəki göstəricidən 1,1 faiz çoxdur.
Yanvar-may aylarında 54,4 milyon manatlıq kənd təsərrüfatı məhsulları istehsal olunub. Bu, 2018-ci ilin müvafiq dövrü ilə müqayisədə 2,6 faiz artım deməkdir.
İnformasiya və rabitə xidmətlərinin dəyəri 3,8 faiz artıb.
5 ayda bank və kredit təşkilatları hüquqi və fiziki şəxslərə 34 milyon 638 min manat məbləğində kreditlər verib, bu da bir il öncəki göstəricidən 51,3 faiz çoxdur.
Hesabata əsasən, muxtar respublikada 383 növdə məhsul istehsal olunur, əhalinin 350 növdə məhsula tələbatı tamamilə yerli imkanlar hesabına ödənir.
Yanvar-may aylarında 151 milyon 89 min ABŞ dolları dəyərində xarici ticarət dövriyyəsi qeydə alınıb. İxracın dəyəri 127 milyon 395 min ABŞ dolları təşkil edib, 103 milyon 701 min 100 ABŞ dolları dəyərində müsbət saldo yaranıb.
Yanvar-aprel aylarında muxtar respublika iqtisadiyyatında bir işçiyə hesablanmış orta aylıq əməkhaqqı 436,8 manata yüksəlib.
