Manatı qorumağa nə qədər valyuta gedib?
Dövlət Neft Fondu Mərkəzi Bankın iyun ayında keçirdiyi valyuta hərraclarında 315,9 milyon ABŞ dolları məbləğində vəsait satıb. Rəsmi hesabat iyulun 2-də yayılıb.
Novator.az bildirir ki, yanvarın hərraclarında fonddan 634,9 milyon dollar, fevralın hərraclarında 316,2 milyon dollar, martın hərraclarında 600,5 milyon dollar, aprelin hərraclarında 423,7 milyon dollar, mayın hərraclarında 352,4 milyon dollar alınıb.
2019-cu ilin ilk yarısında manatı qorumağa 2 milyard 643,6 milyon dollar vəsait gedib.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar göstərilib.
2015-ci il fevralın 21-də Mərkəzi Bank dolların kursunu 0,7862 manatdan 1,05 manata, dekabrın 21-də 1,55 manata qaldırıb. Həmin ilə 1,5594 manatla nöqtə qoyulub.
2016-cı ildə rəsmi qiymət 1,7707 manata çatıb, 2017-ci il dekabrın 13-dən dollar banklara 1,7001 manata təklif edilib. 2018-ci il martın 7-dən 1,7 manat səviyyəsi qüvvədədir.
Mərkəzi Bank iyulun 3-də avronu 1,9190, Gürcüstan larisini 0,6039, Rusiya rublunu 0,0268, Türkiyə lirəsini 0,3005 manata satır.
Avro 2019-cu ilə 1,9323, lari 0,6346, rubl 0,0245, lirə 0,3141 manatla başlayıb.
