Xidmət və sərmayə hesabatı
2019-cu ilin yanvar-may aylarında ictimai iaşə dövriyyəsi 2018-ci ilin ilk beş ayı ilə müqayisədə real ifadədə 3,3 faiz artaraq 536,3 milyon manat olub.
Novator.az-ın məlumatına görə, Dövlət Statistika Komitəsi onu da bildirir ki, beş ayda əhaliyə göstərilən ödənişli xidmətlərin dəyəri 2018-ci ilin eyni dövrü ilə müqayisədə real ifadədə 1,2 faiz artaraq 3 milyard 324,2 milyon manata çatıb. Yanvar-may aylarında hər bir ölkə sakini orta hesabla 336,6 manatlıq ödənişli xidmətlərdən istifadə edib.
Başqa bir hesabata görə, yanvar-may aylarında ölkənin iqtisadi və sosial sahələrinin inkişafı üçün əsas kapitala 5 milyard 38,7 milyon manat və ya əvvəlki ilin müvafiq dövrü ilə müqayisədə 6,1 faiz az vəsait yönəldilib. Qeyri-neft sektoruna yönəldilmiş vəsaitin həcmi isə 5,6 faiz artıb.
Xarici müəssisə və təşkilatlar əsas kapitala 1 milyard 370,3 milyon manat vəsait yönəldib. Bu vəsaitin 83,3 faizi Böyük Britaniya, Türkiyə, İsveçrə, ABŞ, Yaponiya, Malayziya, Rusiya, İran və Çexiya sərmayədarlarına məxsusdur.
