Müsavat başqanı Tbilisidə görüşlər keçirib
Müsavat Partiyasının başqanı Arif Hacılı və başqan müavini Səxavət Soltanlı Gürcüstan paytaxtı Tbilisidə səfərdə olublar.
Bastainfo.com-un məlumatına görə, Beynəlxalq Liberal İttifaqın tədbirinə qatılan Müsavat təmsilçiləri Tbilisidə bir sıra görüşlər də keçiriblər. Onlar Gürcüstan parlamentinin keçmiş spikeri David Usupaşvili, Gürcüstanın keçmiş xarici işlər naziri Mayya Pancikidze, Gürcüstan azadlıq hərəkatının liderlərindən olan David Berdzenişvili, Almaniyanın Gürcüstandakı səfiri və digər şəxslərlə görüşüblər.
Arif Hacılının “Facebook” şəbəkəsində yazdığına görə, görüşlərdə Azərbaycanın və regionun çağdaş durumu, mövcud problemlər, o cümlədən Gürcüstanda yaşayan azərbaycanlıların problemləri, Keşikçidağ ətrafında yaranmış böhran və digər məsələlər müzakirə edilib.
Müsavat təmsilçiləri iyunun 20-də Bakıya dönüblər.
