Büdcədə 426,8 milyon manatlıq kəsir yaranıb
Dövlət Statistika Komitəsi 2019-cu ilin yanvar-may aylarına aid makroiqtisadi göstəriciləri açıqlayıb. Novator.az-ın məlumatına görə, hesabatda bildirilir ki, yanvar-may aylarında Azərbaycanda 30,6 milyard manatlıq və ya əvvəlki ilin müvafiq dövrü ilə müqayisədə 2,2 faiz çox ümumi daxili məhsul (ÜDM) istehsal edilib. Beş ayda iqtisadiyyatın qeyri neft-qaz sektorunda əlavə dəyər 2,4 faiz, neft-qaz sektorunda 1,9 faiz artıb.
Əhalinin hər nəfərinə düşən ÜDM 3099 manat göstərilir.
2018-ci ilin yanvar-may ayları ilə müqayisədə kənd təsərrüfatı məhsulunun 6,7 faiz, o cümlədən bitkiçilik məhsulları istehsalının 24,9 faiz, heyvandarlıq məhsulları istehsalının 2,9 faiz artdığı vurğulanır.
Rəsmi bilgiyə əsasən, nəqliyyat sektorunda yük daşınması 2 faiz, sərnişin daşınması 1,5 faiz, informasiya və rabitə xidmətlərinin həcmi dəyər ifadəsində 14,9 faiz, əhalinin gəlirləri nominal ifadədə 6,8 faiz yüksəlib.
Yanvar-may aylarında dövlət büdcəsinə 8 milyard 999,3 milyon manat vəsait daxil olub, büdcədən 9 milyard 426,1 milyon manat vəsait xərclənib, büdcənin icrasında 426,8 milyon manatlıq kəsir yaranıb.
Mayın 1-nə ölkənin bank və digər kredit təşkilatlarının kredit portfeli milli valyuta ekvivalentində 13 milyard 11,4 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 11,6 faizinə bərabər olub.
Əhalinin banklardakı əmanətlərinin milli valyuta ekvivalentində məbləği mayın 1-nə 8 milyard 715 milyon manat həddində rəsmiləşib.
