Xarici ticarətin 5 aylıq statistikası
2019-cu ilin beş ayı üzrə xarici ticarət göstəriciləri bəlli olub. Novator.az bildirir ki, Dövlət Gömrük Komitəsinin rəsmi hesabatına görə, yanvar-may aylarında Azərbaycanın xarici ticarət əməliyyatlarının həcmi 14,4 milyard dollar olub. Bunun 8,6 milyard dolları ixrac, 5,8 milyard dolları idxaldır.
Beş ayda 174 ölkə ilə ticarət əməliyyatı aparılıb, gömrük orqanları büdcəyə 1 milyard 733,5 milyon manat ödəyib.
İxracın 78 faizi xam neft və xam neft məhsulları, 2,5 faizi neft məhsulları, 10,1 faizi təbii qaz, 2,8 faizi meyvə-tərəvəz, 1 faizi plastmassa və ondan hazırlanan məmulatlardır.
İdxalın 18,1 faizi maşın, mexanizm, elektrik aparatları, avadanlıqlar və onların hissələri, 10,8 faizi yeyinti məhsulları, 7,7 faizi nəqliyyat vasitələri və onların hissələri, 6,6 faizi qara metallar və onlardan hazırlanan məmulatlar, 2,5 faizi plastmassa və ondan hazırlanan məmulatlar, 1,9 faizi əczaçılıq məhsulları, 1,8 faizi oduncaq və ondan hazırlanan məmulatlar, 1,6 faizi geyim əşyaları və geyim üçün ləvazimat kimi rəsmiləşib.
Yanvar-may aylarında ixracın 5,2 faizi MDB ölkələrinin, 55,9 faizi Avropa İttifaqı ölkələrinin, 38,9 faizi digər ölkələrin payına düşüb.
İdxalda MDB-nin payı 21,5 faiz, Avropa İttifaqının payı 17,1 faiz, digər ölkələrin payı 61,4 faiz göstərilir.
Beş ayda əsas tərəfdaş İtaliya olub. Bu ölkə ilə ticarət dövriyyənin 18,7 faizi həcmində rəsmiləşib. Türkiyə 10,7 faizlə ikinci, Rusiya 7,6 faizlə üçüncüdür.
İxracda əsas ölkə İtaliya (29,7 faiz), idxalda İsveçrədir (14,2 faiz).
