Məhkəmə sistemində dəyişiklik layihəsi
Parlamentin 13 iyun iclasında “Məhkəmələr və hakimlər haqqında” qanuna dəyişiklik ilk oxunuşda qəbul edilib. Yeniliyə əsasən, inzibati-iqtisadi məhkəmələr inzibati məhkəmələrə çevrilir və kommersiya məhkəmələri yaradılır.
İnzibati məhkəmə Azərbaycanın inzibati ərazi vahidləri üzrə təşkil edilir.
Novator.az bildirir ki, layihəyə görə, kommersiya məhkəməsi birinci instansiya məhkəməsi kimi qanunla səlahiyyətlərinə aid edilmiş kommersiya mübahisələrinə dair işlərə baxır.
Kommersiya məhkəməsi ölkənin inzibati ərazi vahidləri üzrə təşkil edilir. Onun təşkili və olduğu yer prezidentin qərarı ilə müəyyən olunur. Ərazi yurisdiksiyasını müəyyən etmək Məhkəmə-Hüquq Şurasının səlahiyyətindədir.
Naxçıvan Muxtar Respublikasının Kommersiya Məhkəməsi Naxçıvan şəhərində təşkil edilir və onun yurisdiksiyası bölgənin bütün ərazisinə şamil edilir.
Kommersiya məhkəməsi sədrdən və hakimlərdən ibarətdir. Tərkibində 12 və daha çox hakim olan kommersiya məhkəməsində sədr müavini vəzifəsi təsis edilir. Hakimlərin sayını Məhkəmə-Hüquq Şurası müəyyənləşdirir.
