Vergi yığımı: yeni statistika açıqlanıb
Vergilər nazirinin müşaviri Xəqani Abdullayev statistik bilgilər. O qeyd edib ki, 2019-cu ilin yanvar-aprel aylarında vergi daxilolmaları əvvəlki ilin müvafiq dövrü ilə müqayisədə 9,4 faiz artaraq 2 milyard 609,5 milyon manat olub, proqnoz 111,7 faiz səviyyəsində icra edilib: “Qeyri-neft-qaz sektoru üzrə daxilolmalar 18,3 faiz artıb, artım tempi qeyri-neft sektorunda ümumi daxili məhsulun nominal artım tempini 2,3 dəfə üstələyib. Ümumi vergi daxilolmalarında qeyri-neft-qaz sektorunun xüsusi çəkisi 62 faizdən 67,1 faizə yüksəlib. Qeyri-neft-qaz sektorunun özəl bölməsi üzrə daxilolmalarda 22,3 faiz artım qeydə alınıb”.
Müşavirin bildirdiyinə görə, 4 ayda əlavə dəyər vergisi (ƏDV), aksiz və mənfəət vergisi üzrə daxilolmalarda da artım olub: “ƏDV üzrə artım 13,2 faiz, o cümlədən qeyri-neft-qaz sektorunda 22,6 faiz təşkil edib. Aksizlər üzrə artım 32,3 faiz, mənfəət vergisi üzrə 12,2 faizdir.
Qeyri-neft sektoru üzrə dövriyyələrin ən yüksək artım templəri kənd təsərrüfatında (51,5 faiz) və ticarətdə (25,1 faiz) olub. İctimai iaşənin dövriyyəsi 19,8, topdansatış ticarət dövriyyəsi 16,7 faiz, o cümlədən ƏDV-yə cəlb olunan dövriyyə 24,8 faiz artıb. Pərakəndə ticarətin dövriyyəsi 37,5 faiz yüksəlib. Qeyri-neft sektorunda elektron qaimə-faktura ilə rəsmiləşən dövriyyənin cəmi dövriyyədə xüsusi çəkisi 59,3 faizdən 65,2 faizə qalxıb”.
Xəqani Abdullayev əmək bazarında da əhəmiyyətli şəffaflaşma proseslərinin müşahidə olunduğunu bildirib: “2019-ci ilin birinci rübündə muzdla işləyənlərin sayı ötən ilin eyni dövrü ilə müqayisədə 8,1 faiz artıb. Cəmi əməkhaqqı fondunda 16,2 faiz yüksəliş qeydə alınıb”.
Xəbəri Vergiler.az yayıb.
