İstanbul kimi seçir?
İyunun 23-ü Türkiyənin İstanbul şəhərində bələdiyyə başçısı postuna yeni seçki keçiriləcək. Qələbəyə iki şanslı namizəd var – hakim Ədalət və İnkişaf Partiyasından Binəli Yıldırım, müxalif Cümhuriyyət Xalq Partiyasından Əkrəm İmamoğlu.
31 mart seçkisində İstanbul böyük şəhər bələdiyyəsinə Əkrəm İmamoğlu başçı seçilib və aprelin 17-də səlahiyyətlərinin icrasına başlayıb. Binəli Yıldırımı namizəd göstərmiş Ədalət və İnkişaf Partiyası Ali Seçki Qurumuna müraciət edərək İstanbul bələdiyyəsinə yeni seçki keçirilməsi tələbi qoyub. Ali Seçki Qurumunun mayın 6-da çıxardığı qərarla 31 mart seçkisinin nəticələri ləğv olunub, iyunun 23-nə yeni seçki təyin edilib.
Novator.az bildirir ki, “Areda” araşdırma şirkətinin 9 min 317 nəfər arasında keçirdiyi son sorğuya əsasən, Əkrəm İmamoğlu 51% səslə önə çıxır.
Sorğuya qatılanların 47,8%-i Binəli Yıldırıma, 1,2%-i digər namizədlərə səs verəcəyini bəyan edib.
Respondentlərin 52,3%-i Əkrəm İmamoğlunun bələdiyyə başçısı seçiləcəyinə inandığını vurğulayıb.
“Areda”nın sorğusunda iştirak edənlərin 54,7%-i seçkinin yenilənməsi barədə qərarı yanlış saydığını deyib.
Əkrəm İmamoğlu 1970-ci ildə doğulub. 2008-ci ildə Cümhuriyyət Xalq Partiyasına daxil olub. 2014-cü ildən İstanbulun Bəylikdüzü rayonunun bələdiyyə başçısı postunu tutub.
Binəli Yıldırım 1955-ci ildə doğulub. Ədalət və İnkişaf Partiyasının qurucularındandır. 2002-ci ildən bütün hökumətlərdə təmsil olunub, 2016-2018-ci illərdə baş nazir, 2018-2019-cu illərdə parlament sədri vəzifələrində çalışıb.
