Yeni təyinatlar
Prezident İlham Əliyev iyunun 10-da sərəncam imzalayaraq kənd təsərrüfatı naziri İnam Kərimovu və birinci vitse-prezidentin köməkçisi Xalid Əhədovu “Azərbaycan Sənaye Korporasiyası” Açıq Səhmdar Cəmiyyətinin Müşahidə Şurasının üzvləri təyin edib.
Novator.az bildirir ki, səhmləri dövlətə məxsus “Azərbaycan Sənaye Korporasiyası” Açıq Səhmdar Cəmiyyəti prezident İlham Əliyevin 6 noyabr 2017-ci il fərmanı ilə yaradılıb. Qurumun təsisi dövlət əmlakının idarə edilməsinin səmərəliliyini artırmaq, korporativ idarəetmə prinsiplərinə əsaslanan hesabatlılıq və nəzarət sistemini formalaşdırmaq, dövlətə məxsus müəssisələr arasında əlverişli kooperasiya əlaqələrinin yaradılmasına və istehsal potensialının dəyər zəncirinin həlqələri üzrə artırılmasına nail olmaq zərurəti ilə əsaslandırılıb. Müşahidə Şurasına prezidentin iqtisadi siyasət və sənaye məsələləri üzrə köməkçisi-şöbə müdiri Natiq Əmirov sədrlik edir. Baş direktor postunu Milli Məclisin deputatı Kamran Nəbizadə tutur.
1971-ci il təvəllüdlü Kamran Nəbizadə Moskva Dövlət Universitetinin iqtisadiyyat fakültəsini və Ümumrusiya Xarici Ticarət Akademiyasının xarici iqtisadi əlaqələr fakültəsini bitirib. İqtisadiyyat üzrə fəlsəfə doktorudur.
Dövlət Neft Şirkətində, Sənaye və Energetika Nazirliyində məsul vəzifələrdə çalışıb, sahibkarlıq fəaliyyəti ilə məşğul olub.
