Qarabağ rejimində istefa
Azərbaycanın Dağlıq Qarabağ bölgəsindəki işğalçı rejimin başçısı Bako Saakyan iyunun 11-də Vitali Balasanyanı “Təhlükəsizlik Şurasının katibi” postundan azad edib. Novator.az-ın məlumatına görə, qərar Vitali Balasanyanın öz istəyi əsasında qəbul olunub.
Vitali Balasanyan 1959-cu ildə Əsgəranda anadan olub. Azərbaycan torpaqlarının qanlı işğalının, soyqırımı cinayətlərinin ən fəal iştirakçılarındandır. Separatçı rejimdə diviziya komandiri, “müdafiə nazirinin müavini” vəzifələrini tutub. “Təhlükəsizlik Şurasının katibi” vəzifəsində 2016-cı il noyabrın 3-dən çalışırdı.
1988-ci ilin fevral ayında ermənilər Azərbaycanın Dağlıq Qarabağ Muxtar Vilayətinin Ermənistanın tərkibinə verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-cü ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu işğal edib.
Vitali Balsanyan Dağlıq Qarabağ rejiminin 2020-ci ildə keçirəcəyi “prezident seçkisində” namizəd olmaq arzusundadır.
Bako Saakyan 2007 və 2012-ci illərin “ümumxalq seçkilərində” “prezident” seçilib. Rejimin 2017-ci ildə qəbul etdiyi yeni “konstitusiya” ilə Bako Saakyanın səlahiyyət müddəti 2020-ci ilədək uzadılıb.
1991-ci ildən bəri Dağlıq Qarabağ rejiminə Leonard Petrosyan, Artur Mkrtçyan, Georgi Petrosyan , Robert Köçəryan, Arkadi Qukasyan da rəhbərlik ediblər.
