Nazirlikdən cəza hesabatı
Vergilər Nazirliyi açıqlama yayıb. Açıqlamada xatırladılır ki, bir müddət əvvəl nazirlik Baş Prokurorluqla birlikdə bəzi ərazi vergilər idarələrinin fəaliyyətlərinin yoxlanması zamanı aşkar edilən qanun pozuntularına yol vermiş vergi əməkdaşları barədə cinayət işinin açıldığını bəyan edib: “Araşdırmalar zamanı bir sıra vergi əməkdaşlarının ödəniş məbləğlərini nağd şəkildə alıb mənimsəməsi müəyyən edilib. Vergilər Nazirliyi mənimsəməyə yol vermiş əməkdaşların vergi xidmətində fəaliyyətinə xitam verib, eyni zamanda aşkar olunmuş faktları toplayaraq Baş Prokuror yanında Korrupsiyaya Qarşı Mübarizə Baş İdarəsinə göndərib. Bu, vergi orqanlarının hüquq mühafizə orqanlarına təqdim etdiyi ilk hal deyil. 2018-ci ildə və 2019-cu ilin birinci rübündə korrupsiyaya qarşı mübarizə tədbirləri çərçivəsində 24 nəfər barədə 14 material hüquq mühafizə orqanlarına təqdim edilib”.
Daxili Təhlükəsizlik Departamentinin baş direktoru Cavanşir Nuriyev bildirir ki, Vergilər Nazirliyinin struktur vahid və bölmələrinin fəaliyyətində yol verilə biləcək nöqsan və çatışmazlıqların vaxtında müəyyənləşdirilməsi üçün təhlillər, daxili audit və xidməti araşdırmalar aparılır: “Aşkar edilmiş neqativ hallar yalnız rüşvət faktları ilə məhdudlaşmır. Bəzi hallarda vergi əməkdaşlarının himayəçilik etməsi, yaxud vergidən yayınmaq üçün ayrı-ayrı şəxslərə kömək etməsi, bəzən maraq toqquşmasına yol verilməsi və vergi qanunvericiliyinin tələblərinin düzgün tətbiq olunmaması nəticəsində yaranmış risklərlə bağlı hallar qeydə alınıb. 2018-ci ildə və 2019-cu ilin birinci rübü ərzində yerli vergi strukturlarında aparılmış kompleks audit tədbirləri zamanı aşkar edilmiş müxtəlif faktlar üzrə 34 nəfərin vergi orqanlarında fəaliyyətinə xitam verilib, 11 əməkdaş vəzifədən kənarlaşdırılıb”.
