Seçki yarışını Tokayev uddu
Qazaxıstanda iyunun 9-da keçirilmiş növbədənkənar prezident seçkisinin ilkin nəticələri açıqlanıb. Novator.az-ın məlumatına görə, dövlət başçısı postu uğrunda 7 nəfərin mübarizəsi prezident Qasım-Comərd Tokayevin qələbəsi ilə başa çatıb. O, səslərin 70,7%-ni toplayıb.
Əmircan Kosanovun 16%, Daniya Yespayevanın 5,2%, Toleutay Rəhimbəyovun 3,2%, Amangəldi Taspixovun 2%, Cambıl Əhmədbəyovun 1,8%, Sәdіbəy Tüqelin 0,9% səs götürdüyü bildirilir.
Qazaxıstanın birinci prezidenti Nursultan Nazarbayev bu il martın 20-də istefa verib. O, hakim Nur Otan Partiyasının lideridir. Qasım-Comərd Tokayev bu partiyadan namizəd göstərilib. O, martın 20-də Qazaxıstanın ikinci prezidenti elan edilib. Həmin günədək Qasım-Comərd Tokayev parlamentin yuxarı palatasının – Senatın sədri olub.
Ölkədə növbəti prezident seçkisi 2020-ci ilin yazında keçirilməli idi. Ancaq Qasım-Comərd Tokayev aprelin 9-da növbədənkənar seçkiyə sərəncam verib.
1953-cü ildə doğulan Qasım-Comərd Tokayev Moskva Dövlət Beynəlxalq Münasibətlər İnstitutunu bitirib. Xarici işlər naziri (1994-1999, 2002-2007), baş nazir (1999-2002), Senatın sədri (2007-2011, 2013-2019), BMT baş katibinin müavini (2011-2013) vəzifələrini tutub.
