Moldovada ikihakimiyyətlilik
Moldovada siyasi böhran yaranıb. Novator.az-ın məlumatına görə, buna yeni hökumət məsələsinə fərqli yanaşmalar səbəb olub.
Ölkədə fevralın 24-də keçirilmiş parlament seçkisində prezident İqor Dodona dəstək verən Sosialist Partiyası qalib gəlib. Bu qurum 101 yerlik parlamentdə 35 mandata sahib çıxıb. Hakim Demokrat Partiyası 30 mandat, ACUM bloku 26 mandat, Şor Partiyası 7 mandat əldə edib. Qalan 3 mandat müstəqil namizədlərə qismət olub.
İyunun 8-də Sosialist Partiyası ilə ACUM bloku parlament çoxluğu formalaşdıraraq yeni hökumət qurublar. Ancaq Konstitusiya Məhkəməsi hökumət qurmaq üçün 90 günlük müddətin iyunun 7-də bitdiyini əsas gətirərək qərarı ləğv edib. Prezident İqor Dodonu vəzifədən müvəqqəti uzaqlaşdıran Konstitusiya Məhkəməsi onun səlahiyyətlərini Demokrat Partiyasının lideri, baş nazir Pavel Filipə həvalə edib. Pavel Filip isə parlamenti buraxaraq sentyabrın 6-na növbədənkənar parlament seçkisi təyin edib. Bu qərar kütlələrin etiraz aksiyalarına gətirib. Qərb dairələri də parlamentin buraxılmasını təqdir etmir.
