Fuad Abbasov deportasiya olunur
Azərbaycanlı jurnalist və bloqçu Fuad Abbasovun bu gecə Rusiyadan deportasiya olunacağı bildirilir.
Fuad Abbasov Rusiyada Qarabağ məsələsini müntəzəm qaldıran, Ermənistanın işğalçılıq siyasətini kəskin tənqid edən şəxs kimi tanınır.
Jurnalist mayın 16-da Moskva vilayətinin Ximki şəhərində saxlanılıb. Ximki Şəhər Məhkəməsi onun Rusiyada yaşamaq haqqında icazəsinin ləğv olunmasına baxmayaraq, vaxtında ölkəni tərk etmədiyi üçün deportasiya edilməsi haqqında qərar çıxarıb. Fuad Abbasov mayın 16-dan Moskva vilayətinin Korolyov şəhərində miqrantlar üçün xüsusi saxlanma məntəqəsinə yerləşdirilib.
Mayın 24-də ONA-ya müsahibəsində Fuad Abbasov deyib ki, Rusiyada yaşayış icazəsinin martın 17-də ləğv edilməsindən xəbərsiz olub. Jurnalist Rusiyada yaşayış haqqında sənədinin müddətinin 2023-cü ilə qədər olduğunu və indiyə kimi heç bir inzibati qayda pozuntusuna yol vermədiyini vurğulayıb. Bloqçu bildirib ki, saxlanma məntəqəsində ona həmin sənədin ləğv olunduğunu və ölkəni tərk etməli olduğunu bəyan ediblər. Halbuki Fuad Abbasov məntəqəyə gətirilənədək bununla bağlı heç bir xəbərdarlıq almayıbmış.
İyunun 6-da Moskva Vilayət Məhkəməsində jurnalistin Rusiyadan deportasiya edilməsi ilə bağlı qərardan verdiyi apellyasiya şikayətinə baxılıb. Moskva Vilayət Məhkəməsi Ximki Şəhər Məhkəməsinin deportasiya qərarını qüvvədə saxlayıb.
“Report”un məlumatına görə, Fuad Abbasova 50 il Rusiya ərazisinə ayaq basmaq qadağan olunub.
