AXCP üzvünün cəzası azaldılıb
AXCP Gənclər Komitəsinin üzvü Orxan Baxışlının cəzası 6 illik həbsdən 3 illik həbsə endirilib.
Qərar iyunun 4-də Ali Məhkəmədə çıxarılıb.
2018-ci il sentyabrın 18-də Bakı Ağır Cinayətlər Məhkəməsi Orxan Baxışlını Cinayət Məcəlləsinin 234.4.3-cü (satış məqsədilə külli miqdarda narkotik əldə etmə, daşıma və ya saxlama) maddəsi ilə təqsirli bilərək 6 il müddətinə azadlıqdan məhrum edib.
Orxan Baxışlı mayın 6-da Bakıda tutulub. Mayın 8-də Yasamal Rayon Məhkəməsi onun barəsində həbs qətimkan tədbiri seçib.
Həbsindən bir neçə gün əvvəl – mayın 3-də Orxan Baxışlı 2005-ci ildə öldürülən jurnalist Elmar Hüseynovun Qurd qapısı qəbiristanlığındakı məzarı üstündə çıxış edib. Beynəlxalq Söz və Mətbuat Azadlığı Gününə həsr olunmuş ziyarətdə gənc fəal Elmar Hüseynovun qətlində hakimiyyəti günahlandırıb. AXCP fəalları həbsi bu çıxışla bağlayırlar. Hüquq mühafizə orqanları isə gənc fəalın üstündən 6 qram heroin çıxdığını bəyan edib.
Ali Məhkəmə 234.4.3-cü maddəni 234.1-ci maddə (satış məqsədi olmadan narkotik maddənin qanunsuz əldə edilməsi, saxlanması, daşınması) ilə əvəz edib və nəticədə Orxan Baxışlının cəzası azaldılıb.
Orxan Baxışlı günahsız olduğunu və siyasi motivlə həbs edildiyini bildirir.
