Ermənistan hökumətində təyinatlar
Ermənistan prezidenti Armen Sərkisyan baş nazir Nikol Paşinyanın təqdimatlarına baxaraq hökumətin yeni strukturuna uyğun təyinatlar edib. Novator.az-ın məlumatına görə, Tiqran Xaçatryan iqtisadiyyat naziri, Akob Arşakyan yüksək texnologiyalar sənayesi naziri, Suren Papikyan ərazi idarəçiliyi və infrastruktur naziri, Araik Arutyunyan elm, təhsil, mədəniyyət və idman naziri, Erik Qriqoryan təbiəti mühafizə naziri postlarına gətiriliblər. Onlar əvvəlki hökumətdə də nazir idilər.
Ötən ay nazirliklərin sayı birləşmələr hesabına 17-dən 12-yə düşüb. Yeni hökumətdə Xarici İşlər; Müdafiə; Ədliyyə; Fövqəladə Hallar; Maliyyə; Əmək və Sosial Məsələlər; Səhiyyə nazirlikləri də var.
Hazırda Zöhrab Mnasakanyan xarici işlər naziri, David Tonoyan müdafiə naziri, Artak Zeynalyan ədliyyə naziri, Feliks Solakyan fövqəladə hallar naziri, Atom Cancuqazyan maliyyə naziri, Zarui Batoyan əmək və sosial məsələlər naziri, Arsen Torosyan səhiyyə naziridir.
Baş nazirin iki müavini var: Tiqran Avinyan və Mger Qriqoryan.
Dövlət Nəzarəti Xidməti, Milli Təhlükəsizlik Xidməti və Polis birbaşa baş nazirə tabe qurumlardır.
Nazirlər Kabinetinin nəzdində 5 komitə yer alır: Şəhərsalma Komitəsi; Dövlət Gəlirləri Komitəsi; Statistika Komitəsi; Daşınmaz Əmlakın Kadastrı Komitəsi; Nüvə Təhlükəsizliyi Komitəsi.
Hökumətə tabe olan 6 müfəttişlik var: Şəhərsalma, Texniki Təhlükəsizlik və Yanğın Təhlükəsizliyi Müfəttişliyi; Təhsil Müfəttişliyi; Təbiəti və Yerin Təkini Mühafizə Müfəttişliyi; Səhiyyə və Əmək Müfəttişliyi; Bazara Nəzarət Müfəttişliyi; Ərzaq Təhlükəsizliyi Müfəttişliyi.
