Yoxlamalar sahəsində yenilik
Milli Məclisin 30 may iclasında “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” qanuna dəyişiklik edilib. Qanun yoxlayıcı orqanların sahibkarlıq fəaliyyətinin həyata keçirildiyi yerlərə gəlməklə apardığı bütün növ yoxlama tədbirlərinə, o cümlədən araşdırmalar, müayinələr, monitorinqlər, müşahidələr, təftişlər, nəzarətlər, xronometrajlar, reydlər, baxışlar və digər bu cür tədbirlərə şamil olunur. Vergi yoxlamaları və maliyyə bazarları sahəsində aparılan yoxlamalar istisnadır.
Novator.az bildirir ki, yeniliyə görə, qanun tikintiyə dövlət nəzarətinin həyata keçirilməsi ilə əlaqədar yoxlamalara da şamil edilməyəcək.
Başqa bir dəyişikliyə əsasən, yanğın nəzarəti, təhlükə potensiallı obyektlərin və dağ-mədən sahələrinin təhlükəsiz istismarına nəzarət və radiasiya təhlükəsizliyinə nəzarət sahələrində plan üzrə (növbəti) yoxlamalar bu dövriliklə aparılacaq: yüksək risk qrupuna aid edilən sahibkarlara münasibətdə – altı ayda bir dəfədən çox olmayaraq; orta risk qrupuna aid edilən sahibkarlara münasibətdə – ildə bir dəfədən çox olmayaraq; aşağı risk qrupuna aid edilən sahibkarlara münasibətdə – iki ildə bir dəfədən çox olmayaraq.
Parlament sahibkarlıq sahəsində aparılan yoxlamaların dayandırılması barədə qanuna da dəyişiklik edib.
2015-ci il noyabrın 1-dən tətbiq edilən qanun yoxlamaları 2021-ci il yanvarın 1-dək yasaqlayır (Baş Prokurorluğun korrupsiya cinayətlərinin araşdırılması üzrə apardığı yoxlamalar istisna olmaqla).
Yeniliyə görə, nəzərdə tutulmuş müddətdə yanğın nəzarəti, tikintiyə dövlət nəzarəti, təhlükə potensiallı obyektlərin və dağ-mədən sahələrinin təhlükəsiz istismarına nəzarət və radiasiya təhlükəsizliyinə nəzarət sahəsində yoxlamalar mümkün olacaq.
İndiyəcən qanun vergi yoxlamaları, maliyyə bazarları sahəsində yoxlamalar, gömrük auditi, dərman vasitələrinin keyfiyyəti, təhlükəsizliyi qaydalarına riayət edilməsi və qida məhsullarının təhlükəsizliyinə nəzarətin həyata keçirilməsi ilə bağlı yoxlamalar, “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanunun tələblərinə əməl edilməsinə nəzarət üzrə yoxlamalar, habelə insanların həyat və sağlamlığına, dövlətin təhlükəsizliyinə və iqtisadi maraqlarına mühüm təhlükə yaradan hallar üzrə yoxlamalar aparmaq imkanı verirdi.
