Poroşenko partiya sədri seçildi
Mayın 31-i Ukrayna paytaxtı Kiyevdə Avropa Həmrəyliyi Partiyasının qurultayı keçirilib. Novator.az-ın məlumatına görə, qurultay sabiq prezident Pyotr Poroşenkonu partiya sədri seçib.
Avropa Həmrəyliyi Partiyası mayın 24-də parlamentdəki Pyotr Poroşenko blokunun – Həmrəylik Partiyasının bazasında yaradılıb. Pyotr Poroşenko Avropa Həmrəyliyi Partiyasına mayın 30-da daxil olub.
1965-ci il sentyabrın 26-da Ukraynanın Odessa vilayətində doğulan Pyotr Poroşenko 1989-cu ildə Kiyev Dövlət Universitetinin beynəlxalq münasibətlər və beynəlxalq hüquq fakültəsini, 1992-ci ildə həmin təhsil ocağının aspiranturasını bitirib. Hüquq elmləri namizədidir.
1993-cü ildən “Ukrprominvest” konserninin baş direktoru, 2002-ci ildən Ukrayna Milli Bankı Şurasının sədr müavini, 2007-ci ildən sədri olub.
2005-ci ildə Milli Təhlükəsizlik və Müdafiə Şurasının katibi, 2009-2010-cu illərdə xarici işlər naziri, 2012-ci ildə iqtisadi inkişaf və ticarət nazir postlarını tutub.
1998, 2002, 2006 və 2012-ci illərin parlament seçkilərində deputat mandatı alıb.
Pyotr Poroşenko 2014-cü il iyunun 7-dən bu il mayın 20-dək Ukrayna prezidenti olub. Ölkənin yeni prezidenti Vladimir Zelenski mayın 20-si and içərək səlahiyyətlərinin icrasına başlayıb. O, parlamenti – Ali Radanı buraxıb. Növbədənkənar parlament seçkisi iyulun 21-nə təyin olunub.
