Polşalı memarların xatirəsinə həsr edilən lövhələr açılıb
Mayın 31-i Bakıda Polşa memarlarının xatirəsinə həsr edilən lövhələrin açılış mərasimi keçirilib. Paytaxtın Polşa memarları küçəsində keçirilən mərasimdə Azərbaycan prezidenti İlham Əliyevlə polşalı həmkarı Anjey Duda iştirak ediblər.
AZƏRTAC-ın arayışına görə, Bakının tarixi məhəlləsində yerləşən küçələrdən birinə Polşa memarları adı verilib. Buradakı binaların birində polşalı memarlar – İosif Qoslavski, Kazimir Skureviç, İosif Ploşko və Yevgeni Skibinskinin adları həkk olunan xatirə lövhəsi və onların memarı olduqları bir neçə binanın daşdan yonulmuş şəkilləri vurulub. Xatirə lövhələrinin müəllifi Azərbaycanın əməkdar memarı Elbay Qasımzadədir.
XIX əsrin sonu, XX əsrin əvvəllərində Bakıya əcnəbi sərmayədarlarla yanaşı tanınmış mühəndislər, inşaat üzrə mütəxəssislər də ayaq açıb. Şəhərin ərazisi genişlənib, yeni binalar inşa edilib, rayonlar meydana gəlib. Bakının memarlıq simasının zənginləşməsində yerli memarlarla bərabər əcnəbi mütəxəssislər də fəal iştirak ediblər. Şərq üslubunu heç vaxt itirməyən şəhər eyni zamanda bir Avropa şəhərinə çevrilib. Bu məsələdə, ümumiyyətlə o dövrkü Bakının arxitekturasında polşalı memarlar xüsusi rol oynayıb. Həmin memarlar Azərbaycan paytaxtının bir sıra tarixi binasının müəllifi olublar. Məsələn, Murtuza Muxtarovun sarayı, İsmailiyyə, Bakı Şəhər İcra Hakimiyyətinin binası, Ağabala Quliyevin mülkü və bir çox tarixi binalar polşalı memarların layihələri əsasında inşa olunub.
