Ümumi təhsil qanunu
Ümumi təhsil qanunu prezident İlham Əliyevin imzası ilə qüvvəyə minib. Novator.az-ın məlumatına görə, qanun ümumi təhsil sahəsində dövlət siyasətinin əsas prinsiplərini, ümumi təhsilin təşkilati-hüquqi və iqtisadi əsaslarını müəyyən edir. Sənəd Azərbaycanda fəaliyyət göstərən dini təhsil müəssisələrinə, xarici dövlətlərin diplomatik nümayəndəlikləri yanındakı təhsil müəssisələrinə şamil edilmir.
Ümumi təhsil müəssisələrində tədris dili dövlət dili – Azərbaycan dilidir. Vətəndaşların və təhsil müəssisəsi təsisçilərinin istəyi nəzərə alınaraq ümumi təhsil müəssisələrində tədris digər dillərdə də aparıla bilər. Tədris digər dillərdə aparılan ümumi təhsil müəssisələrində Azərbaycan dili, ədəbiyyatı, tariхi və cоğrafiyası tədris оlunmalıdır.
Ümumi təhsil sisteminə bunlar daxildir: bütün ümumi təhsil müəssisələri, ümumi təhsil prosesi ilə məşğul olan və ümumi təhsil xidmətləri göstərən digər qurumlar, ümumi təhsil fəaliyyəti ilə bağlı informasiya mərkəzləri, idman, sağlamlıq və istirahət düşərgələri, ümumi təhsili idarəetmə orqanları və onların tabeliyindəki qurumlar; ümumi təhsil sahəsində fəaliyyət göstərən qeyri-hökumət təşkilatları, assosiasiya və cəmiyyətlər, elmi-metodik şuralar.
Qanunda ümumi təhsilin səviyyələri belə müəyyən olunub: məktəbəhazırlıq mərhələsi (5 yaş); ibtidai təhsil (I-IV siniflər); ümumi orta təhsil (V-IX siniflər); tam orta təhsil (X-XI siniflər).
Dövlətin və bələdiyyənin yaratdığı ümumi təhsil müəssisəsi publik hüquqi şəxsdir.
Mülkiyyət növünə görə dövlət, bələdiyyə və özəl ümumi təhsil müəssisələri fəaliyyət göstərir.
Ümumi təhsil müəssisələrinin bu növləri var: ibtidai ümumtəhsil məktəbi; ümumi orta ümumtəhsil məktəbi; tam orta ümumtəhsil məktəbi; lisey; gimnaziya; ümumtəhsil internat məktəbi; inteqrasiya təlimli internat tipli təhsil müəssisəsi; inteqrasiya təlimli ümumi təhsil müəssisəsi; xüsusi məktəb; xüsusi internat məktəbi; inteqrasiya təlimli internat tipli gimnaziya; valideyn himayəsindən məhrum uşaqlar üçün ümumtəhsil internat məktəbi; digər məktəblər.
Ümumi orta təhsil icbaridir.
Dövlət təhsil müəssisələrində ümumi təhsil pilləsinin dövlət standartlarını əhatə edən tam orta təhsil pulsuzdur.
