Daha bir jurnalistlə bağlı məhdudiyyət ləğv edilib
Jurnalist Aynurə Heydərovanın ölkədən çıxışına qoyulan məhdudiyyət götürülüb.
Bununla bağlı Baş Prokurorluğun Ağır Cinayətlərə Dair İşlər üzrə İstintaq İdarəsindən Aynurə Heydərovanın ailəsinə sənəd təqdim edilib.
Meydan.tv xəbər verir ki, Aynurə Heydərova hazırda Azərbaycanda yaşamır. O, məhdudiyyət qoyulandan sonra Azərbaycana gəlib ailəsi ilə görüşə bilməyib.
Məhdudiyyətin götürülməsi ilə əlaqədar açıqlamasında jurnalist bəyan edib ki, Azərbaycana qayıtmaq istəyir.
Məhdudiyyət 4 il qabaq prokurorluqda “Meydan TV”yə qarşı başlanan cinayət işinə görə qoyulmuşdu.
Eyni işlə əlaqədar daha bir neçə jurnalistin ölkədən çıxışına qadağa vardı. Həmin qadağaların əksəri bugünlərdə ləğv edilib.
Son günlər Baş Prokurorluğun Ağır Cinayətlərə Dair İşlər üzrə İstintaq İdarəsi jurnalistlər Aynur Elgünəş, Aytən Fərhadova, Aytac Əhmədova, Tural Əsədli, Natiq Cavadlı, İzolda Ağayeva, Səlimə Cəlilova, Sevinc Vaqifqızı, Orxan Məmməd, Elnur Muxtar və yazar Rasim Qaracanın ölkədən çıxışına qoyulan məhdudiyyətləri götürüb.
Ölkədən çıxışına qadağa qoyulmuş jurnalistlərin bir qrupu mayın 3-də Baş Prokurorluğun Ağır Cinayətlərə Dair İşlər üzrə İstintaq İdarəsinin binası qarşısında etiraz aksiyası keçirmişdi.
2019-cu ilin fevral ayında Seçkilərin Monitorinqi və Demokratiyanın Tədrisi Mərkəzi Azərbaycanda hərəkət azadlığı və siyasi motivli səyahət qadağaları ilə bağlı dəyərləndirmə sənədi yaymışdı. Sənəddə qeyd olunmuşdu ki, ölkədən çıxışına qadağa qoyulan şəxslərdən 18 nəfəri jurnalist, 5 nəfəri siyasi fəal, 4 nəfəri hüquqşünas və hüquq müdafiəçisi, 2 nəfəri yazar, 1 nəfəri isə vətəndaş cəmiyyəti təşkilatı rəhbəridir.
Xarici ölkələrə səfər məhdudiyyəti ləğv edilən jurnalistlərin bir çoxu hazırda da “Meydan TV” ilə əməkdaşlıq edirlər.
Tolum.tv-nin məlumatına görə, hüquqşunas Emin Aslanın da “Meydan TV”yə qarşı açılan cinayət işinə görə ölkədən çıxışına qadağa var. Bu qadağa hələ ləğv edilməyib.
