Çempionlar Liqası: kim haradan başlayır?
2019-2020-ci illər mövsümündə UEFA Çempionlar Liqasına qrup mərhələsindən qoşulacaq komandalar bəllidir. Novator.az-ın məlumatına görə, 17 sentyabr-11 dekabr arasında keçiriləcək raunda birbaşa vəsiqələr İspaniyanın “Barselona”, “Atletiko”, “Real”, “Valensiya”, İngiltərənin “Mançester Siti”, “Liverpul”, “Çelsi”, “Tottenhem”, İtaliyanın “Yuventus”, “Napoli”, “Atalanta”, “İnter”, Almaniyanın “Bavariya”, “Borussiya” (Dortmund), “Leypsiq”, “Bayer”, Fransanın PSJ, “Lill”, “Lion”, Rusiyanın “Zenit”, “Lokomotiv” (Moskva), Portuqaliyanın “Benfika”, Ukraynanın “Şaxtyor”, Belçikanın “Genk”, Türkiyənin “Qalatasaray”, Avstriyanın “Zalsburq” komandalarına qismət olub.
Qrupa qalan vəsiqələrin sahibləri beş mərhələdən ibarət ələmələrdə müəyyənləşəcək.
Təsnifat raundunda (25-28 iyun) Cəbəllütariqdən “Linkoln”, Andorradan “Santa Kolama”, San Marinodan “Tre Penne”, Kosovodan “Feronikeli” komandaları var.
Azərbaycan təmsilçisi “Qarabağ” turnirə birinci mərhələdən (9-17 iyul) başlayır. Onun mümkün rəqibləri Litvadan “Suduva”, Bosniyadan “Sarayevo”, Maltadan “Valletta”, Polşadan “Pyast”, Rumıniyadan “Kluj”, Macarıstandan “Ferensvaroş”, Estoniyadan “Nomme Kalyu”, Monteneqrodan “Sutyeska”, Albaniyadan “Partizani”, İslandiyadan “Valyur”, Şimali İrlandiyadan “Linfild”, Farer adalarından “HB Torshavn”, Latviyadan “Riqa”, Gürcüstandan “Saburtalo”dur.
Bu raundda “Seltik” (Şotlandiya), BATE (Belarus), “Astana” (Qazaxıstan), “Ludoqorets” (Bolqarıstan), “Maribor” (Sloveniya), “Srvena Zvezda” (Serbiya), “Şerif” (Moldova), “Rusenborq” (Norveç), HİK (Finlandiya), “Dandolk” (İrlandiya), “Düdelanj” (Lüksemburq), “Şkendiya” (Şimali Makedoniya), “Nyu Sents” (Uels), “Slovan” (Slovakiya), AİK (İsveç), “Pünik” (Ermənistan) komandaları da yer alır.
İkinci mərhələdə (23-31 iyul) Danimarkadan “Kopenhagen”, Xorvatiyadan “Dinamo”, Kiprdən APOEL, İsraildən “Makkabi” (Tel-Əviv), İsveçrədən “Bazel”, Yunanıstandan “Olimpiakos”, Hollandiyadan PSV, Çexiyadan “Viktoriya” start götürür.
Üçüncü mərhələyə (6-13 avqust) Hollandiyadan “Ayaks”, Yunanıstandan PAOK, Portuqaliyadan “Portu”, Ukraynadan “Dinamo”, Belçikadan “Brügge”, Rusiyadan “Krasnodar”, Türkiyədən “Başakşəhər”, Avstriyadan LASK, dördüncü mərhələyə (20-28 avqust) İsveçrədən “Yanq Boyz”, Çexiyadan “Slaviya” daxil edilib.
