Baş redaktorun şikayəti təmin edilməyib
Teref.info saytının baş redaktoru Nurəddin Xocanın (Nurəddin İsmayılov) Bakı Ağır Cinayətlər Məhkəməsinin hökmündən verdiyi apellyasiya şikayətinə baxılması başa çatıb.
“Report”un xəbərinə görə, Bakı Apellyasiya Məhkəməsinin hakimi İlqar Murquzovun sədrliyi ilə keçirilən prosesdə Nurəddin Xocanın şikayəti təmin edilməyib, Bakı Ağır Cinayətlər Məhkəməsinin hökmü qüvvədə saxlanıb.
Martın 28-də Bakı Ağır Cinayətlər Məhkəməsi Nurəddin Xocaya 5 il 6 ay şərti azadlıqdan məhrumetmə cəzası verib. Baş redaktor vəzifə səlahiyyətlərini aşmaqda, vəzifə saxtakarlığında və Teref.info saytında dövlət əleyhinə açıq çağırışlar etməkdə (Cinayət Məcəlləsinin 281.2, 309 və 313-cü maddələri) təqsirli bilinib.
1957-ci il təvəllüdlü Nurəddin Xoca Qarabağ müharibəsinin iştirakçısı olub, döyüşlərdə “Bozqurd” adlı batalyona komandirlik edib.
Teref.info saytına giriş 2018-ci ildə Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası, Səbail Rayon Məhkəməsinin qərarı əsasında məhdudlaşdırılıb.
