Bakıda orta maaş 817 manatı ötüb
Bakı Şəhər Statistika İdarəsi sosial-iqtisadi göstəriciləri açıqlayıb. Novator.az-ın məlumatına görə, hesabatda bildirilir ki, 2019-cu ilin yanvar-aprel aylarında sənayedə istehsal olunmuş malların və göstərilmiş xidmətlərin həcmi 13 milyard manat təşkil edib. Sənaye məhsulunun 81,6 faizi mədən sektorunda istehsal olunub. Qeyri-dövlət sektorunun payı 83,2 faiz göstərilir.
Dörd ayda aparılan inşaat işlərinin 67,1 faizi tikinti, yenidənqurma və genişləndirmə, 7,7 faizi əsaslı təmir, 4,9 faizi cari təmir, 20,3 faizi sair tikinti işlərinin payına düşüb.
Ticarət dövriyyəsinin həcmi 2018-ci ilin yanvar-aprel ayları ilə müqayisədə 3,3 faiz, iaşə dövriyyəsi real ifadədə 4,1 faiz, əhaliyə göstərilən ödənişli xidmətlərin dəyəri real ifadədə 0,7 faiz artıb.
İşçilərin orta aylıq nominal əməkhaqqının 4,9 faiz artaraq aprelin 1-nə 817,3 manata çatdığı vurğulanır.
