Bakı finalını “Çelsi” apardı
UEFA-nın Avropa Liqasında 2018-2019-cu illər mövsümü başa çatıb. Novator.az-ın məlumatına görə, mayın 29-u Bakı Olimpiya Stadionunda keçirilən final oyununda İngiltərə paytaxtının “Çelsi” və “Arsenal” komandaları üz-üzə gəlib. Kuboku Londona “Çelsi” aparıb – 4:1. Bu, 1971-ci ildən keçirilən, 2008-ci ilədək UEFA kuboku adlanmış turnirdə “Çelsi”nin 2-ci titulu olub.
İndiyəcən Avropa Liqasında daha 27 klub zəfər yaşayıb. Rekord “Sevilya”ya məxsusdur: klub 5 dəfə turniri zirvədə tamamlayıb. “Liverpul”, “Yuventus”, “İnter” (İtaliya), “Atletiko” 3, “Tottenhem”, “Feyenoord”, “Borussiya” (Mönhenqladbah), “Höteborq”, “Real” (Madrid), “Parma”, “Portu” 2, “Anderlext”, “Ayaks”, PSV, “Ayntraxt” (Frankfurt), “İpsviç”, “Bayer”, “Napoli”, “Bavariya”, “Şalke”, “Qalatasaray”, “Valensiya”, SSKA (Moskva), “Zenit”, “Şaxtyor” (Ukrayna), “Mançester Yunayted” 1 uğur əldə ediblər.
“Arsenal” erməni futbolçu Henrix Mxitaryanı Bakıya gətirməyib.
1989-cu ildə Yerevanda anadan olan Henrix Mxitaryan “Arsenal”a qədər Ermənistanın “Pünik”, Ukraynanın “Metallurq”, “Şaxtyor”, Almaniyanın “Borussiya” (Dortmund), İngiltərənin “Mançester Yunayted” klublarında oynayıb. Ermənistan milli komandasının kapitanıdır.
Futbolçu işğal altında olan Azərbaycan torpaqlarına səfərləri və separatçı Dağlıq Qarabağ rejiminə yardımları ilə tanınır.
Henrix Mxitaryan Dortmund “Borussiya”sında oynayanda onun komandası Avropa Liqasında “Qəbələ” ilə bir qrupda mübarizə aparıb. O, 2015-ci il oktyabrın 22-si Bakıda keçirilən oyuna gəlməyib, noyabrın 5-i Dortmundda isə Azərbaycan komandasının qapısına top vurub.
Bu mövsüm “Arsenal” Ağdamın “Qarabağ” klubu ilə bir qrupda yarışıb. Henrix Mxitaryan 2018-ci il oktyabrın 4-ü Bakıda keçirilən oyuna gətirilməyib, dekabrın 13-ü Londonda isə ehtiyat skamyasında yer alıb.
