Avropa Liqası: klublar, mərhələlər
2019-2020-ci illər mövsümündə 17 komanda UEFA Avropa Liqasına birbaşa qrup mərhələsindən başlayacaq. Novator.az-ın məlumatına görə, İspaniyanın “Sevilya”, “Xetafe”, İngiltərənin “Arsenal”, “Mançester Yunayted”, Türkiyənin “Beşiktaş”, Portuqaliyanın “Sportinq”, Rusiyanın SSKA, Almaniyanın “Volfsburq”, “Borussiya” (Mönhenqladbah), İtaliyanın “Latsio”, “Milan”, Fransanın “Sent-Etyenn”, “Renn”, Belçikanın “Mexelen”, Ukraynanın “Aleksandriya”, Avstriyanın “Volfsberq”, İsveçrənin “Luqano” klublarına bu imkan verilib.
İlkin təsnifat raundu 27 iyun-4 iyul arasına, birinci mərhələ 11-18 iyul arasına, ikinci mərhələ 25 iyul-1 avqust arasına, üçüncü mərhələ 8-15 avqust arasına, dördüncü mərhələ 22-29 avqust arasına təyin olunub.
Qrup raundunun sentyabrın 19-dan dekabrın 12-dək davam etməsi nəzərdə tutulur.
Azərbaycanı Avropa Liqasında “Qəbələ”, “Neftçi” və “Səbail” təmsil edəcək.
“Neftçi” və “Səbail” mübarizəyə birinci mərhələdən başlayır. Onların potensial rəqibləri arasında Rumıniyanın “Universitatya”, Sloveniyanın “Mura”, Şimali Makedoniyanın “Şkupi”, “Akademiya”, “Makedoniya”, Estoniyanın “Levadiya”, “Flora”, “Trans”, Slovakiyanın “Dunayska Streda”, “Rujomberok”, Farer adalarının “B36 Torshavn”, Gürcüstanın “Çixura”, “Torpedo”, Macarıstanın “Debretsen”, “Honved”, Moldovanın “Milsami”, “Petrokub”, “Speranta”, Albaniyanın “Teuta”, Latviyanın “Liepaya”, RFS, Maltanın “Hibernians”, “Balzan”, “Qzira Yunated”, İslandiyanın “Reykyavik”, “Breydablik”, İrlandiyanın “Şemrok Rovers”, “Sent-Patriks Atletik”, Bosniyanın “Şiroki Briyeq”, “Radnik”, Uelsin “Konnah Kuey”, Finlandiyanın “İnter”, RoPS, KuPS, Litvanın “Stumbras”, Monteneqronun “Zeta” klubları var.
“Qəbələ” turnirə ikinci mərhələdən qoşulacaq. Bu raundda İtaliyadan “Roma”, Almaniyadan “Ayntraxt” (Frankfurt), İspaniyadan “Espanyol”, Serbiyadan “Partizan”, İngiltərədən “Vulverhempton”, Fransadan “Strasburq”, Hollandiyadan “Alkmaar”, “Utrext”, Portuqaliyadan “Gimarayeş”, Yunanıstandan “Aris” də yer alır.
