Müsavatın qurultayı: 321 nümayəndə müəyyənləşib
Müsavat Partiyasının 9-cu qurultayına hazırlıq davam edir. Mayın 27-də Novator.az-a danışan qurultay komitəsinin sədri, partiya başqanının müavini Gülağa Aslanlı bildirib ki, indiyədək 45 rayon-şəhər təşkilatında yığıncaq və konfranslar keçirilib, qurultaya nümayəndələr seçilib: “Qurultayın 321 nümayəndəsi bəllidir. 20-dən yuxarı yerli təşkilatda yığıncaq keçirilməsi gözlənir. Hakimiyyətin basqılarının davam etməyəcəyi təqdirdə işimizi iyun ayının sonunda bitirib qurultay gününü müəyyənləşdirməyi planlayırıq”.
Müsavat Partiyası 1911-ci ildə yaradılıb. Partiyanın ilk başqanı Məhəmməd Əmin Rəsulzadə, ikinci başqanı Mirzə Bala Məmmədzadə, üçüncü başqanı Kərim Odər, dördüncü başqanı Məhəmməd Azər Aran olub.
Sovet hakimiyyəti illərində mühacirətdə fəaliyyət göstərən partiya 1992-ci ildə Bakıda keçirilən 3-cü qurultayda bərpa olunub, İsa Qəmbər başqan seçilib. Partiyanın 1995, 1997, 2001 və 2006-cı illərdə keçirilən qurultayları İsa Qəmbəri başqan postunda saxlayıb.
2014-cü ilin sentyabrında keçirilən 8-ci qurultayda başqan vəzifəsinə Arif Hacılı seçilib.
