Jurnalisti nəyə görə tutublar?
Jurnalist, bloqçu Səxavət Məmməd mayın 27-də Ağdam Rayon Məhkəməsinin qərarı ilə 10 sutka inzibati həbs cəzası alıb. Yenicag.az xəbər verir ki, hakim Elşad Bayramovun sədrlik etdiyi məhkəmə prosesində qərar Səxavət Məmmədin maliyyə öhdəliyini yerinə yetirməməsi – aliment borcunu ləngitməsi ilə əsaslandırılıb.
Jurnalistin çalışdığı Yenicag.az həbsi Səxavət Məmmədin mayın 25-i bloqunda müdafiə nazirinin birinci müavini, Silahlı Qüvvələrin Baş Qərargah rəisi general-polkovnik Nəcməddin Sadıqovu tənqid etməsi ilə əlaqələndirir.
Səxavət Məmməd bloqunda Nəcməddin Sadıqovu Qarabağ müharibəsindəki uğursuzluqlarda, Rusiyaya işləməkdə, Azərbaycan Ordusunun NATO standartlarına keçidinə mane olmaqda, Silahlı Qüvvələrdəki yaxşı kadrları sıxışdırmaqda günahlandırıb.
Novator.az bildirir ki, Nəcməddin Sadıqov 1956-cı ildə Dərbənd şəhərində doğulub. Bakıda Ali Ümumqoşun Komandirlər Məktəbini, Moskvada Frunze adına Hərbi Akademiyanı bitirib.
1979-1992-ci illərdə SSRİ Silahlı Qüvvələri tərkibində vzvod, rota, batalyon komandiri və polk komandirinin müavini vəzifələrində xidmət edib.
1992-ci ildən Azərbaycan Silahlı Qüvvələrində briqada komandiri, korpus komandiri, cəbhə komandanının birinci müavini-Səhra İdarəetmə Qərargahının rəisi vəzifələrini tutub.
1993-cü il noyabrın 2-dən Silahlı Qüvvələrin Baş Qərargah rəisi-müdafiə nazirinin birinci müavinidir.
