![]({"full":{"0":"2019\/05\/futbol-3.jpg","1":750,"2":503,"3":false,"file":"https:\/\/novator.az\/wp-content\/uploads\/2019\/05\/futbol-3.jpg"}})
“Futbol+”: məsələ Prezident Administrasiyasında müzakirə olundu
- 27 May 2019
- comments
- Novator.az
- Posted in ManşetXəbər
“Futbol+” qəzetinin baş redaktoru Mahir Rüstəmli mayın 24-də Prezident Administrasiyasının ictimai-siyasi məsələlər şöbəsi müdirinin müavini Vüqar Əliyevlə görüşüb. Görüşdə qəzetin dövlət yardımından kənarda qalması müzakirə olunub.
Kütləvi İnformasiya Vasitələrinin İnkişafına Dövlət Dəstəyi Fondu 2019-cu il aprelin 1-dən sahə nəşrlərinin, o cümlədən 1997-ci ildən çıxan aparıcı idman qəzeti “Futbol+”in maliyyəsini kəsib.
Qərara qədər “Futbol+” fonddan ayda 5 min manat alıb. Bundan məhrum olan “Futbol+” maliyyə böhranı keçirir, qəzetin dövriliyi həftədə 5 dəfədən 4 dəfəyə enib.
Redaksiya hesab edir ki, Kütləvi İnformasiya Vasitələrinin İnkişafına Dövlət Dəstəyi Fondunun qərarı “Futbol+”i çökdürməyə yönəlmiş addımdır. “Futbol+” qərara yenidən baxılmasını, aylıq maliyyənin bərpasını tələb edir və etiraz aksiyaları keçirir.
Mayın 23-də kollektiv Prezident Administrasiyasının qarşısında toplaşmağa cəhd göstərib. Polis aksiyanın qarşısını alıb, amma baş redaktora və iki əməkdaşa administrasiyanın qəbul şöbəsində olmaq imkanı yaradıb. Oradan telefonla ictimai-siyasi məsələlər şöbəsinin müdir müavini Tahir Süleymanovla əlaqə saxlayan Mahir Rüstəmliyə mayın 24-də digər müdir müavin Vüqar Əliyevlə görüşmək təklif olunub.
Novator.az-a danışan Mahir Rüstəmli deyib ki, mayın 24-də Vüqar Əliyev onu qəbul edib: “Vüqar Əliyevə ölkənin ən populyar idman nəşrinin maliyyələşmədən kənarda qalmasının ağır nəticələri barədə ətraflı məlumat verdim, “Futbol+”in media bazarından sıxışdırılıb çıxarılmasını ədalətsizlik saydığımı bildirdim. Administrasiya rəsmisi “Futbol+”in üzləşdiyi problemin diqqət mərkəzində olduğunu, məsələnin prezidentin ictimai-siyasi məsələlər üzrə köməkçisi-şöbə müdiri Əli Həsənovla müzakirə ediləcəyini dedi”.
Mahir Rüstəmli əlavə edib ki, redaksiyanın davası pul davası yox, haqq davasıdır: “Hörmətsizliyə, ayrı-seçkiliyə məruz qalan idman mediası üçün haqq davası aparırıq. Bu yoldan geri çəkilmək fikrimiz yoxdur. Maliyyə yardımından kənarda qalmağımızla barışmırıq”.
Qəzetlərə maliyyə yardımı: şərtlər dəyişdi