Ukraynada növbədənkənar seçki təyin olundu
Mayın 23-də Ukrayna prezidenti Vladimir Zelenskinin parlamenti – Ali Radanı buraxan fərmanı qüvvəyə minib. Novator.az-ın məlumatına görə, növbədənkənar parlament seçkisi iyulun 21-nə təyin olunub.
Növbəti parlament seçkisi payızda olmalı idi.
Xalq Xidmətçisi Partiyasının namizədi olan 1978-ci il təvəllüdlü Vladimir Zelenski aprelin 21-də prezident seçilib, mayın 20-də səlahiyyətlərinin icrasına başlayıb.
Sabiq prezident Pyotr Poroşenkoya dəstək verən blokun Ali Radada 135 mandatı var.
Xalq Cəbhəsi 80, Müxalif blok 38, Samopomoş Partiyası 25, Dirçəliş Partiyası 25, Radikal Partiya 21, Batkivşina Partiyası 20, “Xalq iradəsi” qrupu 18 mandata sahibdir.
61 deputat heç bir fraksiyaya qatılmır.
Ölkə konstitusiyasına görə, hökuməti 450 yerlik parlamentdə azı 226 mandatı olan siyasi qüvvə qurur.
Parlamentin 225 deputatı majoritar (dairələr üzrə), 225 deputatı proporsional (partiya siyahıları üzrə) sistemlə seçilir.
