KTMT-də yeni baş katib: bir mərhələ keçildi
Kollektiv Təhlükəsizlik Müqaviləsi Təşkilatının (KTMT) baş katibi postuna belaruslu Stanislav Zasın namizədliyi irəli sürülüb. Novator.az-ın məlumatına görə, qərar KTMT Xarici İşlər Nazirləri Şurasının mayın 22-si Qırğızıstanın paytaxtı Bişkekdə keçirilən iclasında qəbul olunub. Təklif üzv ölkələrin liderlərinin daxil olduğu ali orqana – Kollektiv Təhlükəsizlik Şurasına göndərilib.
Kollektiv Təhlükəsizlik Şurasının sammiti payızda keçirilməlidir. Qərar rəsmiləşəcəyi halda Stanislav Zas 2020-ci il yanvarın 1-dən baş katib olacaq.
İclasda həmçinin Ermənistanın təklifi ilə KTMT-nin nizamnaməsinə dəyişiklik layihəsi hazırlamaq razılaşdırılıb. Təklifə əsasən, KTMT-nin baş katibi postdan vaxtından əvvəl gedəcəyi halda vəzifə onun təmsil etdiyi ölkədə qalmalıdır.
KTMT 1992-ci il mayın 15-də yaradılıb. Hərbi-siyasi birliyə Rusiya, Belarus, Ermənistan, Qazaxıstan, Qırğızıstan və Tacikistan daxildir.
Qurumda ali vəzifəli şəxs olan baş katib postunu 2017-ci il mayın 2-dən erməni general-polkovnik Yuri Xaçaturov tutub. Üç il müddətinə seçilən Yuri Xaçaturov 2018-ci il oktyabrın 30-da Ermənistanın təşəbbüsü ilə vəzifədən uzaqlaşdırılıb. Baş katib səlahiyyətləri müvəqqəti olaraq rusiyalı müavin Valeri Semerikova verilib.
Ermənistan baş katib postuna sabiq müdafiə naziri Vaqarşak Arutyunyanı namizəd göstərib. Ancaq KTMT-nin digər üzvləri Ermənistan nümayəndəsinin yenidən baş katib olmasını istəməyib.
Stanislav Zas 1964-cü ildə anadan olub. 1985-ci ildə Bakı Ali Ümumqoşun Komandirləri Məktəbini, 1996-cı ildə Belarus Hərbi Akademiyasını, 2005-ci ildə Rusiya Silahlı Qüvvələri Baş Qərargahının Hərbi Akademiyasını bitirib. 2015-ci ildən Belarus Təhlükəsizlik Şurasının dövlət katibidir.
