Nazir təlim nöqtələrində
Azərbaycan Ordusu mayın 20-dən geniş əməliyyat-taktiki təlimlər keçirir. Əsas mövzu düşmənin gecə həmləsinin dəf edilməsi, müxtəlif istiqamətlərdə ona zərbələr endirib hücuma keçmədir.
Təlimlərə 10 minədək şəxsi heyət, 150 tank və digər zirehli texnika, 200-dək müxtəlif çaplı raket və artilleriya qurğusu, yaylım atəşli reaktiv sistemləri və minaatan, 35 təyyarə və vertolyot cəlb olunub.
Mod.gov.az-ın 21 may məlumatına görə, müdafiə naziri general-polkovnik Zakir Həsənov təlim məntəqələrinə baş çəkib.
Əsas komanda məntəqəsində nazirin rəhbərliyi ilə keçirilən toplantıda dinamik dəyişən vəziyyət və qəbul edilən qərarlara dair komandir-rəis heyəti və digər vəzifəli şəxslərin məruzələri dinlənilib. Ərazinin kəşfi nəticəsində əldə olunan məlumatlar əsasında təlim iştirakçıları maket üzərində tapşırıqların dəqiqləşdirilməsi, qoşunların qarşılıqlı əlaqədə fəaliyyətlərinin təşkilini həyata keçiriblər.
Alınmış döyüş tapşırığı əsasında keçirilən bölmələrin məşqlərini izləyən nazir hərbi qulluqçular qarşısında çıxış edib, tövsiyələrini çatdırıb və xidmətdə fərqlənən bir qrup hərbçiyə qiymətli hədiyyələr təqdim edib.
Bölmələrin döyüş atışlı taktiki məşğələsində şəxsi heyət müxtəlif maneələri dəf etməyi və düşmən üzərinə hücumu göstərib.
Ərazidə yaradılmış təlim nöqtələrinə, sinif otaqlarına baş çəkən nazir təlimə cəlb edilən döyüş texnikalarını da yoxlayıb, silah-sursat və şəxsi heyətin təlimlərdə iştirakı, eləcə də tapşırıq və sərəncamların dəqiq icra olunması ilə bağlı müvafiq göstərişlər verib.
Hərbi hissədə yeni tikilmiş yeməkxanaya baş çəkən Zakir Həsənov burada yaradılan şəraitlə tanış olub, ərzaq anbarına baxış keçirib, saxlanılan məhsulların keyfiyyətini yoxlayıb və şəxsi heyətlə birgə nahar edib.
