Naxçıvanın güzəranı: yeni göstəricilər
Naxçıvan Muxtar Respublikasının Dövlət Statistika Komitəsi bölgənin sosial-iqtisadi göstəricilərini açıqlayıb. Novator.az-ın məlumatına görə, hesabatda qeyd olunur ki, yanvar-aprel aylarında muxtar respublikada 727,9 milyon manatlıq ümumi daxili məhsul istehsal olunub, bu da 2018-ci ilin müvafiq dövrü ilə müqayisədə 0,9 faiz çoxdur. Hər adama düşən ümumi daxili məhsulun həcmi 1594,6 manat göstərilir.
Sənayedə 330,7 milyon manat dəyərində (2018-ci ilin ilk dörd ayı ilə müqayisədə 1,4 faiz çox) məhsul istehsal edildiyi, əsas kapitala 288,2 milyon manat vəsait qoyulduğu bildirilir.
Dörd ayda 40,2 milyon manatlıq kənd təsərrüfatı məhsulları istehsal olunduğu, bunun 2018-ci ilin müvafiq dövründə qeydə alınmış göstəricini 2,5 faiz ötdüyü vurğulanır.
İnformasiya və rabitə xidmətlərinin dəyəri 3,2 faiz artıb.
Yanvar-aprel aylarında muxtar respublikanın bank və kredit təşkilatları hüquqi və fiziki şəxslərə 24 milyon 51,1 min manat məbləğində kreditlər verib.
Hesabata əsasən, muxtar respublikada 383 növdə məhsul istehsal olunur, 108-i ərzaq, 242-si qeyri-ərzaq olmaqla 350 növdə məhsula olan tələbat tamamilə yerli imkanlar hesabına ödənir.
Yanvar-aprel aylarında 117,7 milyon ABŞ dolları dəyərində xarici ticarət dövriyyəsi qeydə alınıb.
Birinci rübdə muxtar respublika iqtisadiyyatında bir işçiyə hesablanmış orta aylıq əməkhaqqı 433,3 manata çatıb.
