Azərbaycan “Avroviziya”larda: bütün nəticələr
İctimai teleradioları bir araya gətirən Avropa Yayım Birliyi 1956-cı ildən “Avroviziya” yarışı – mahnı müsabiqəsi keçirir. Azərbaycan “Avroviziya”ya 2008-ci ildən qatılır və bir dəfə – 2011-ci ildə Nigar Camal və Eldar Qasımovla 1-ci yeri götürüb. Bu qələbə sayəsində 2012-ci ilin “Avroviziya” yarışmasına Azərbaycanın paytaxtı Bakı ev sahibliyi edib.
Novator.az bildirir ki, Azərbaycan daha dörd iştirakda ilk beşlikdə qərar tutub. 2013-cü ildə Fərid Məmmədov 2-ci, 2009-cu ildə Aysel Teymurzadə və Araş 3-cü, 2012-ci ildə Səbinə Babayeva 4-cü, 2010-cu ildə Səfurə Əlizadə 5-ci olub.
Digər nəticələr belə sıralanır: 2019-cu ildə Çingiz Mustafayev 7-ci yer, 2008-ci ildə Elnur Hüseynov və Samir Cavadzadə 8-ci yer, 2015-ci ildə Elnur Hüseynov 12-ci yer, 2017-ci ildə Diana Hacıyeva 14-cü yer, 2016-cı ildə Səmra Rəhimli 17-ci yer, 2014-cü ildə Dilarə Kazımova 22-ci yer.
“Avroviziya 2018”dəki təmsilçi Aysel Məmmədova 26 nəfərlik finala çıxa bilməyib. Yarımfinalda topladığı xalları nəzərə alanda o, bütövlükdə yarışın 43 iştirakçısı arasında 30-cu yerdə qərarlaşıb.
Azərbaycanın “Avroviziya”larda 12 iştirakının orta nəticəsi 10-11-ci yerlər arasındadır.
