İsgəndər Həmidov Türkiyəyə aparılıb
Sabiq daxili işlər naziri İsgəndər Həmidov müayinə olunmaq üçün Türkiyəyə aparılıb. Məlumatı mayın 20-də Novator.az-a sabiq nazirin yaxınlarından biri verib. O, İsgəndər Həmidovun səhhətinin qaydasında olduğunu əlavə edib: “Narahatlığa əsas yoxdur”.
2018-ci il dekabrın 4-də ürəyində yaranan problemə görə İsgəndər Həmidov Tibb Universitetinin Tədris Cərrahiyyə Klinikasına yerləşdirilib, dekabrın 5-də isə evə buraxılıb. Onun koronaroqrafiya müayinəsindən – “anju” əməliyyatından keçirilməsi böyrəyindəki problemə görə mümkün olmayıb.
İsgəndər Həmidov 1948-ci ildə Kəlbəcərin Bağlıpəyə kəndində doğulub. İqtisadiyyat və hüquq sahələri üzrə iki ali təhsil alıb. Uzun illər daxili işlər orqanlarında xidmət edib. Milli azadlıq hərəkatının öncül şəxslərindəndir. 1990-cı ildən parlamentin üzvü olub. 1992-1993-cü illərdə Azərbaycanın daxili işlər naziri postunu tutub. 1995-2003-cü illərdə həbsdə yatıb.
İsgəndər Həmidov bu il yanvarın 26-sı Bakıda təsis olunan Azərbaycan Xalq Hərəkatı adlı müxalif blokun öncül şəxslərindəndir.
