Turizm: gələnlər 0,1 faiz, gedənlər 26,9 faiz artıb
2019-cu ilin yanvar-aprel aylarında Azərbaycana 170 ölkədən 848,4 min və ya ötən ilin eyni dövrü ilə müqayisədə 0,1 faiz çox əcnəbi gəlib. Dövlət Statistika Komitəsi Dövlət Sərhəd Xidmətinə istinadla belə məlumat yayıb.
Novator.az bildirir ki, hesabata əsasən, gələnlərin 27,3 faizi Rusiya, 26,8 faizi Gürcüstan, 11,1 faizi Türkiyə, 8 faizi İran, 3,8 faizi Birləşmiş Ərəb Əmirlikləri, hər birindən 1,8 faiz olmaqla Ukrayna və Hindistan, 1,4 faizi Pakistan, 1,3 faizi İraq, 16,6 faizi digər ölkələrin vətəndaşları, 0,1 faizi vətəndaşlığı olmayan şəxslərdir.
Dörd ayda xarici ölkələrə gedən Azərbaycan vətəndaşlarının sayı əvvəlki ilin yanvar-aprel aylarına nəzərən 26,9 faiz artaraq 1 milyon 636,4 min nəfər olub. Ölkə vətəndaşlarının 39,2 faizi İrana, 27,2 faizi Gürcüstana, 18,3 faizi Rusiyaya, 9,7 faizi Türkiyəyə, 5,6 faizi digər ölkələrə gedib.
