Qarabağ Azadlıq Təşkilatına mitinq cavabı
Bakı Şəhər İcra Hakimiyyəti Qarabağ Azadlıq Təşkilatının mayın 18-i Yasamal rayonundakı İdman-Sağlamlıq Kompleksinin stadionunda (metronun “İnşaatçılar” stansiyasının yaxınlığı) keçirmək istədiyi mitinqə razılıq verməyib. “Qarabağa azadlıq!” şüarı ilə keçirilməsi nəzərdə tutulan aksiyanın təşkilatçılarına göndərilən imtina məktubunda qeyd olunur ki, hakimiyyət Azərbaycanın ərazi bütövlüyünün bərpası üçün ölkə daxilində və beynəlxalq miqyasda ciddi iş apardığı üçün mitinqin keçirilməsi məqsədəuyğun hesab edilmir.
Novator.az-ın məlumatına görə, Qarabağ Azadlıq Təşkilatı mediaya açıqlamasında imtinaya belə cavab verib: “İctimai xətlə mübarizənin aparılmasına, ermənilərin cinayətkar siyasətinin ifşa edilməsinə, mitinq və digər vasitələrlə işğala, terrora, etnik təmizləmə siyasətinə qarşı ictimai iradənin, Azərbaycan xalqının Qarabağın azadlığı naminə mübarizə əzminin, erməni işğalına qarşı etirazının kütləvi şəkildə nümayiş etdirilməsinə ehtiyac var. Ona görə də mitinqlərlə bağlı müraciətlərimizi davam etdirəcəyik”.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Ermənistan Dağlıq Qarabağı (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) ələ keçirib.
Qarabağ Azadlıq Təşkilatına tarix elmləri namizədi Akif Nağı sədrlik edir. O, 1993-cü ildən Qarabağ Azadlıq Hərəkatının İdarə Heyətinin üzvü, sonra həmsədri olub, 2000-ci ildən indiki postundadır.
