Xəbərlər yüklənir ...
Əmlak Məsələləri Dövlət Komitəsi daşınmaz əmlakın qeydiyyatı ilə bağlı yeni hesabat yayıb. Rəsmi məlumatda çıxarışların elektron şəkildə verildiyi xatırladılır: “Elektron çıxarışlar “Elektron hökumət” portalına yerləşdirilir. Hazırda orta hesabla gün ərzində 1030-a yaxın elektron çıxarış hüquq sahiblərinə təqdim edilir. Çıxarışları 1 iş günü ərazində də almaq mümkündür”.
Dövlət komitəsi qeyd edir ki, 2019-cu ilin yanvar-aprel ayları ərzində ölkə üzrə 72,4 minə yaxın daşınmaz əmlak obyekti üzərində mülkiyyət hüquqları qeydiyyata alınıb: “Bunun 27,2 faizi ilkin, 72,8 faizi təkrar qeydiyyatdır. Mülkiyyət hüquqlarının qeydiyyatı aparılan əmlaklardan 13,4 mini fərdi yaşayış və bağ evi, 20 minə yaxını mənzil, 36,5 mini torpaq sahəsi, 1500-ə yaxını qeyri-yaşayış binası, 1800-ə yaxını qeyri-yaşayış sahəsi, 400-ə yaxını əmlak kompleksi, çoxmərtəbəli yaşayış binası və çoxillik əkmələr olub.
Dörd ayda 62,5 mindən çox daşınmaz əmlakın texniki inventarlaşdırılması aparılıb və texniki pasport tərtib edilib. Bu müddətdə 15 minə yaxın ipoteka müqaviləsi, 1117 yüklülük (icarə, istifadə) dövlət qeydiyyatına alınıb.
Hüquqi və fiziki şəxslərə dövlət reyestrindən 64 minə yaxın məhdudiyyət arayışı, əhaliyə xidmətlə bağlı 35 mindən çox digər müxtəlif məzmunlu arayışlar verilib”.