Məhbus jurnalistdən yeni xəbər var
Bakupress.az saytının təsisçisi və baş redaktoru, məhbus Şəfəq Ağacanın səhhətinin pisləşdiyi bildirilir.
Şəfəq Ağacan qızı Ağabalayeva mayın 1-i Bakıda tutulub. Polisin onu paytaxtın Nərimanov rayonunda, 5 saylı xəstəxananın qarşısında narkotik satarkən tutduğu açıqlanıb. Məlumata görə, Şəfəq Ağacan çəkisi 311 qramdan çox olan qurudulmuş marixuananı 100 ABŞ dolları və 1830 manata satarkən yaxalanıb.
Mayın 3-də Xətai Rayon Məhkəməsi 3 aylıq həbs qətimkan tədbiri seçib. Bakı İstintaq Təcridxanasında saxlanan jurnalist ittihamları qəbul etmir, şərləndiyini deyir.
Mayın 16-da Şəfəq Ağacana məxsus “Facebook” səhifəsində onun səhhətinin pisləşdiyi xəbəri yayılıb. Açıqlamaya görə, jurnalist təcridxananın tibb otağına götürülüb. Şəfəq Ağacanın anemiya xəstəsi olduğu, ürək çatışmazlığından əziyyət çəkdiyi vurğulanır.
Novator.az bildirir ki, 1976-cı il təvəllüdlü Şəfəq Ağacan Sumqayıtdakı 27 saylı orta məktəbin məzunudur. Bakı Slavyan Universitetini filoloq ixtisası ilə bitirib.
